Ерекше челлендж аясында әлеуметтік желі жұлдызы 1700 метр биіктікте доп тепті.
Ресейлік блогер және Lit Energy медиафутбол клубының президенті Михаил Литвин бұрын-соңды ешкім жасамаған ерекше челлендж орындады. Ол 1700 метр биіктікте футбол ойнап, әлемдік рекорд орнатты.
Михаил Литвин өз YouTube арнасында жариялаған видеосында бірқатар блогер ұсынған экстремал тапсырмаларды орындағанын айтты. Сол тапсырмалардың ең ерекше бөлігі — аспанға футбол ойнауға арналған алаң көтеру.
Бұл — бұған дейін әлемде ешкім жасамаған тәжірибе.
Литвиннің айтуынша, жобаға 30 миллион рубльден астам қаржы жұмсалған. Қауіпсіздік, техникалық есептеулер, мамандар мен құрылғылар — барлығы үлкен дайындықты талап еткен.
Әлемдік рекорд орнату үшін блогер Ресей рекордтар кітабының өкілін арнайы шақырған. Сарапшының мәлімдеуінше, мұндай биіктікте футбол ойнауға бұған дейін еш талпынып көрмеген.