Түркістанда Сәкен Бибосыновқа ерекше құрмет көрсетілді
Түркістанда Жаңа жыл қарсаңында Түркістан облысының әкімі Нұралхан Көшеров әлем чемпионаттарының жеңімпазы мен жүлдегерін марапаттап, оларға жаңа автокөліктердің кілтін табыстады.
Бұл туралы Otyrar хабарлады.
Құрметті марапаттарға бокстан екі дүркін әлем чемпионы Сәкен Бибосынов пен каратэден әлем чемпионатының қола жүлдегері Әсел Қанай ие болды.
Өңір басшысы спортшылардың ел спортының дамуына қосқан үлесін атап өтіп, оларды жоғары деңгейде дайындаған бапкерлер мен ата-аналарға алғыс білдірді.
Бұған дейін Сәкен Бибосынов Орталық Азия инновациялық университетінде салтанатты түрде құрметтелген болатын. Спортшы — осы оқу орнының түлегі. Айрықша спорттық жетістіктері үшін Сәкенге ақ боз тай сыйға тартылып, иығына шапан жабылып, 2 миллион теңгелік сертификат табысталды.