"Паспорт, әмиян және кілемше ғана қалды": Ислам Махачев ұрлыққа тап болды

Ислам Махачев әлеуметтік желідегі парақшасында Италияда ұрлыққа ұшырағанын хабарлады. Оның сөзінше, чемоданындағы бірқатар зат жоғалған.

“Италияға жақсы көңіл-күймен келіп едім, бірақ енді бұл ел маған онша ұнамай қалды. Паспорт пен әмиян ғана қалды. Құжатымды қайтарып берген “жақсы” ұрылар екен. Чемодандағы ең құнды зат — Кварацхелия сыйлаған бутсы еді. Егер футбол сендердің тақырыптарың болмаса, оны қайтарып беруге болады. Уайымдаудың қажеті жоқ, бәрі бақылауда. Кілемше де қалды, негізі маған одан артық ештеңе керек емес”, — деп жазды Махачев.

Аралас жекпе-жек шебері бұған дейін Италияны ұнататынын жасырмаған. Алайда осы жағдайдан кейін оның ел туралы әсері өзгергенін аңғартты. Соған қарамастан, файтер жағдайды сабырмен қабылдап, жанкүйерлерін алаңдамауға шақырды.

Ислам Махачев — Дағыстаннан шыққан ресейлік аралас жекпе-жек шебері. UFC-дегі ең танымал чемпиондардың бірі. Ол 2022 жылдың қазан айында Чарльз Оливейраны жеңіп, ұйымдағы чемпиондық белбеуді иеленген.