Данияр Елеусіновтың жұбайына қатысты сот үкімі шықты
Қарағандыда бокстан Олимпиада чемпионы Данияр Елеусіновтың жұбайына қатысты сот процесі аяқталды.
Жанжал қалай басталған?
Оқиға 2026 жылдың ақпан айында Қарағандыда болған. Іс материалдарына сәйкес, боксшының жұбайы Саидаға анасы мен қызы болып келетін екі тұрғынға дене жарақатын салды деген айып тағылған.
Жәбірленушілердің айтуынша, жанжал олардың пәтерінде болған. Данияр Елеусіновтың жұбайы сол үйдің кіреберісінде тұратын 81 жастағы қарияны қорғау үшін келгенін мәлімдеген.
Сот отырысында Саида қарт кісінің көршілеріне шағымданғанын және өзінің осы жағдайға араласқанын айтқан. Жәбірленуші тараптың сөзінше, жанжал кезінде 81 жастағы ер кісі де төбелеске қатысқан. Бірақ оған айып тағылмаған.
Кінәсін мойындамады
Сотталушы өзіне тағылған айыппен келіспеген. Ол әрекеттерін қажетті қорғаныс шегінде жасадым деп түсіндірген.
Алайда Әлихан Бөкейхан аудандық сотының судьясы Бақтияр Ақанов айыпталушының кінәсі іс материалдарымен толық дәлелденгенін мәлімдеді. Судьяның айтуынша, сот-медициналық сараптамалардың қорытындылары және жәбірленушілер мен куәгерлердің жауаптары сот шешіміне негіз болған.
Сот қандай жаза тағайындады?
Сот Данияр Елеусіновтың жұбайына 100 айлық есептік көрсеткіш көлемінде айыппұл салды. Сонымен қатар ол жәбірленушілерге моральдық зиян үшін 1 миллион теңге және олардың адвокатының қызметіне кеткен шығын үшін тағы 1 миллион теңге төлеуге міндеттелді.
Сот үкімінен кейін Саида журналистерге түсініктеме бермеген. Дегенмен сот отырысында қабылданған шешімге апелляциялық шағым түсіретінін мәлімдеді.
Үкім заңды күшіне енгені туралы ақпарат әзірге жарияланған жоқ.
Бұған дейін 2026 жылдың шілде айында Данияр Елеусіновтың Астанада мас күйде көлік жүргізіп, бірнеше жол-көлік оқиғасына қатысқаны жазылған еді.