Қазақстандық теннисші маусымдағы төртінші титулын жеңіп алды
25.05.2025, 10:00
Қытайдағы халықаралық ITF турнирінде Қазақстан теннисшісі Сандуғаш Кенжебаева жарқырай көзге түсті. Ол ресейлік Софья Лансере екеуі жұптық сайыста чемпион атанды.
olympic.kz
Финалда – тартысты матч және маңызды жеңіс
Мааньшань қаласында (Қытай) өткен ITF турнирінің финалында Сандуғаш Кенжебаева мен ресейлік Софья Лансере қытайлық Мэйки Го мен тайлық Пеангтарн Плипуечке қарсы ойнады.
Ойын үш сетке созылып, 6:3, 3:6, 10:8 есебімен қазақстандық-ресейлік дуэттің пайдасына шешілді. Матч 1 сағат 14 минутқа созылды. Бұл тартысты кездесуде қарсыластар бірінші, ал Кенжебаева мен Лансере екінші нөмірмен турнирге тіркелген болатын.
Маусымдағы төртінші жұптық жеңіс
Бұл жеңіс Сандуғаш Кенжебаева үшін 2025 жылғы маусымдағы төртінші титул болды. Бұған дейін ол Түркияның Анталья қаласында өткен үш жұптық турнирде де топ жарған.