Қазақстанның бірінші ракеткасы, Уимблдон-2022 чемпионы Елена Рыбакина Эр-Риядта өтіп жатқан WTA 2025 финалдық турниріндегі алғашқы жеңісінен кейін өзінің басты мақсатын айтты. Ол бұл турнирді «маусым алдындағы маңызды тест» деп атады.
Әйгілі қазақстандық теннисші Елена Рыбакина WTA финалдық турнирін тамаша бастады. Старттық кездесуде ол америкалық Аманда Анисимованы сенімді жеңді — 6:3, 6:1.
Бұл жеңіс Еленаның сенімін арттырғанымен, ол әлі де сабырлы қалыпта екенін айтты.
«Әр матчта жеңіске ұмтыламын, бірақ қарсыластардың бәрі мықты. Бүгінгі ойындағы нәтижені жалғастыруға тырысамын. Бастысы — өз ойынымды дамыту», — деді Рыбакина Tennis Channel арнасына берген сұхбатында.
Баспасөз-мәслихатында журналистер Еленадан алғашқы жеңістен кейінгі мақсаты жайлы да сұрады.
«Иә, бұл турнир мен үшін маңызды сынақ. Маусым алдындағы дайындыққа дейін өз ойыныңды бағалауға, әлсіз тұстарды көруге мүмкіндік береді. Былтыр маусым алдында екі ай ойнамаған едім, сондықтан бұл турнир маған дайындық тұрғысынан да ерекше. Қазір өзімді әлдеқайда жақсы сезінемін», — деді ол.
Осылайша, Рыбакина Эр-Риядтағы турнирді тек нәтиже үшін емес, жаңа маусым алдындағы тактикалық сынақ және өзін жетілдіру алаңы ретінде қабылдап отыр. 2025 жылы Елена Рыбакина әлемдік рейтингтің алтыншы сатысында тұр.