Қазақстандық боксшы Ресейдегі турнирде қарсыласын талқандап, медальге жақындады
Қазақстан құрамасының бұрынғы үздік боксшысы Ресейдің Хабаровск қаласында өтіп жатқан халықаралық жарыста жарқын жеңіске жетіп, жартылай финалға жолдама алды.
Хабаровскіде Константин Коротковты еске алуға арналған бокстан халықаралық турнирдің үшінші күні өтіп жатыр. 60 келі салмақ дәрежесінде ширек финалдық жекпе-жегін өткізген Римма Волосенко моңғолиялық Монхкор Намуунмен қолғап түйістірді.
Қазақтандық боксшы рингте өзін сенімді ұстап, қарсыласынан барлық жағынан басым түсті. Қазылар алқасының шешімі бір ауыздан шықты — 30:27 есебімен Волосенконың пайдасына.
Бұл жеңістің арқасында Римма турнирдің жартылай финалына өтті. Демек, ол кем дегенде қола медаль иеленіп отыр.
Айта кетейік, Волосенко былтыр Қазақстан құрамасының 60 келідегі негізгі мүшесі мәртебесін жоғалтқан болатын. Бұл орынға Виктория Графеева келді. Ол 2024 жылы Азия чемпионы атанып, биыл Сербияның Ниш қаласында өткен әлем чемпионатында финалға дейін жетті.