Болат Заманбеков пен Мұхаммад Мокаев көз арбасты (ВИДЕО)

Редактор Penalty.kz
29.04.2025, 16:10

Қазақстандық файтер Болат Заманбеков пен Ұлыбритания өкілі Мұхаммад Мокаев Karate Combat 54 турнирі аясында көз арбасу рәсімін өткізді. 

Instagram /@ufc.qz

Болат Заманбеков пен Мұхаммад Мокаев арасындағы шайқас 2 мамыр күні өтеді. Жекпе-жек 61 келі салмақ дәрежесінде ұйымдастырылады. Айта кетейік, қос спортшы әдетте аралас жекпе-жекте (ММА) 57 келіде өнер көрсетеді. Алайда бұл кездесудің нәтижесі олардың ресми ММА статистикасына енгізілмейді.

Karate Combat — толық контактты каратэ лигасы. Бұл ұйым алғаш рет Дубайда құрылып, алғашқы турнирін 2018 жылы Венгрияда өткізген. Лиганың ерекшелігі — жекпе-жектер ашық алаңда, заманауи технологиялармен безендірілген ареналарда өтеді.

UFC-дің бұрынғы чемпиондары — Энтони Петти, Бенсон Хендерсон, Алджамейн Стерлинг және Люк Рокхолд секілді жұлдыздар да Karate Combat турнирлерінде бақ сынаған.

Қазақстан атынан бұл лигада алғаш болып Мария Агапова өнер көрсетті. UFC-де өнер көрсеткен бұрынғы файтер 2024 жылдың мамыр айында 17 жастағы америкалық бразилиялық джиу-джитсу шебері Хелен Креварға небәрі 30 секунд ішінде жеңілді. Хелен Кревар бүгінде аралас жекпе-жек әлемінде жарқырап келе жатқан жас талант ретінде мойындалған.