Dushanbe Grand Slam – 2025: Қазақстан дзюдошылары қай орында?
Душанбеде өтіп жатқан дзюдодан "Үлкен дулыға" турнирінде екінші жарыс күні аяқталды. Қазақстан ұлттық құрамасы әзірге медальдар кестесінде 11-орында тұр.
Дзюдодан халықаралық Grand Slam турнирі Тәжікстан астанасы – Душанбеде өтіп жатыр. Екінші күннің қорытындысы бойынша көш бастап тұрған үш мемлекет:
- Тәжікстан: 3 алтын, 2 күміс, 3 қола
- Франция: 2 алтын, 1 күміс, 2 қола
- Моңғолия: 2 алтын, 1 күміс, 1 қола
Орталық Азиядағы тағы бір мықты құрама — Өзбекстан — 7-орынға тұрақтады (0 алтын, 1 күміс, 3 қола).
Қазақстан құрамасы турнирдің алғашқы күнінде бір ғана медаль жеңіп алды. Қола жүлдені 48 келіге дейінгі салмақта Әбиба Әбужақынова еншіледі.
Қалған қатысушылардың жолы бола қоймады. Екінші күні татамиге шыққан:
Аңсарбек Ғайнуллин (73 кг), Ықылас Әлсейіт (73 кг), Досхан Жолжақсынов (81 кг) бәрі де жарыстың 1/16 финалында жеңіліп қалды. Осылайша медальдық көрсеткішті жақсартуға мүмкіндік болмады.