Шавкат шетте қалды ма? UFC белбеуі үшін енді Махачев күреспек
Жеңіл салмақтағы чемпион Ислам Махачев титул үшін жекпе-жекке дайын екенін мәлімдеп, жартылай орта салмаққа көз тікті.
Жеңіл салмақтағы UFC чемпионы Ислам Махачев жартылай орта салмақта да белбеу үшін күресуге дайын екенін мәлімдеді. Бұл мәлімдеме — жақында өткен Джек Делла Маддалена мен Белал Мұхаммед арасындағы титулдық жекпе-жектен кейін жасалды. Бұл туралы Championat.com хабарлады.
«Қос чемпион болар кез келді!»
33 жастағы ресейлік файтер өзінің әлеуметтік желідегі парақшасында мынадай жазбаны қалдырды:
«Қос чемпион болар уақыт келді! ИншаАллаh! Кеттік!»
Бұл сөздер Махачевтің жартылай орта салмаққа көшуге дайын екенін ресми түрде білдірген алғашқы мәлімдемесі саналады.
Шавкат Рахмонов ше?
Бұған дейін жартылай орта салмақтағы чемпиондық белбеу үшін басты үміткер ретінде қазақстандық Шавкат Рахмонов қарастырылып келген еді. Алайда "Номад" ауыр жарақатына байланысты титулдық жекпе-жектен уақытша бас тартуға мәжбүр болды.
Шавкат Рахмоновтың статистикасы:
- Жеңіліссіз рекорд
- UFC рейтингінде екінші нөмір
Осылайша Махачевтің чемпиондық жекпе-жекке ұмтылысы Рахмоновтың жоспарларын бұзуы мүмкін.
Айта кетейік, қазақстандық файтер қазір жарақатына байланысты ем алып жатыр. Жуырда әлеуметтік желіде жазба жариялап, кәсіби спорт жолындағы қиындықтардың бірін айтқан еді.
«Кәсіби спорт жолында әрдайым өз денсаулығыңды құрбан етесің! Маған қолдау көрсетіп, түсіністікпен қарайтын баршаңызға алғысым шексіз!», – деді отандасымыз.