Қазақстандық файтердің жекпе-жек өткізетіні туралы қауесет жуырда жоққа шығарылды.
Қазақстандық файтер Шавкат Рахмоновтың менеджері Дэниэл Рубенштейн әлеуметтік желіде тараған Шон Брэдиге қарсы кездесу өтеді деген қауесетті теріске шығарды. Бұған дейін жекпе-жек қараша айына жоспарланған деген ақпарат шыққан болатын.
Рубенштейн бұл хабарламаларға X әлеуметтік желісінде жауап берді:
«Адамдар, қашан сіздер ақпаратты ЕКІ тараптан да тексермей тұрып, жалған мәліметті тарата беруді доғарасыздар? Бұл жекпе-жек болмайды. Әсіресе қарашада мүлде өтпейді», – деп жазды менеджер.
Файтердің бапкері Эдуард Базров та шәкіртінің жағдайы туралы пікір білдірді. Оның сөзінше, Шавкат Рахмонов UFC-ге кем дегенде келесі жылы ғана оралады.
Қазіргі таңда спортшы жаттығу процесін бастағанымен, ресми жекпе-жекке шығу уақыты белгісіз.
Еске сала кетейік, Шавкат Рахмонов өзінің соңғы айқасын 2024 жылдың желтоқсанында өткізіп, ирландиялық Иэн Гэрриді жеңген болатын.