Ливерпульде бокстан әлем чемпионатының жартылай финалдық жекпе-жектері өтіп жатыр.
Қазақстан намысын қорғаған Алуа Балқыбекова финал жолдамасын Қытай боксшысы Ци Синьюймен сарапқа салды.
Алуа осыған дейін IBA тұғырында өткен ӘЧ-2025 жеңіп алған еді. Ливерпуль рингінде де сенімді өнер көрсеткен қазақ қызы басты жұмбақ саналатын 22 жастағы Циге қарсы шықты. Қытай боксшысының Boxrec-тағы парақшасында небәрі үш кездесу тіркелген, олардың барлығы осы біріншілікте өткен.
Алғашқы раундтан-ақ Балқыбекова қарсыласын қыспаққа алды. Бес төрешінің бәрі де оның аяқтағы жеңіл қозғалысын, өткір әрі дәл шабуылдарын жоғары бағалады.
Кездесудің екінші бөлігінде қытайлық спортшы алға ұмтылып, қорғанысты ұмыт қалдырды. Осы сәтті пайдаланған Алуа ауыр соққы жасап, рефери Циге есеп ашты. Бұл – жекпе-жектегі алғашқы нокдаун болды.
Қорытынды раундта Балқыбекованың әр соққысы жанкүйерлердің айқайымен қолдау тапты. Қазақстандық бокс жанкүйерлері сүйікті спортшысының финалға өткенін тойлап үлгерді.
Енді Алуаны финалда түркиялық Наз Чакыроглу күтіп тұр.