"Олимпиадада үміт бар". Шавкат Рахмоновтың бапкері Айдос Сұлтанғалидың жеңісі жайлы
Айдос Сұлтанғалидың тарихи жеңісінен кейін қазақстандық спортта жаңа дәуір басталуы мүмкін. 60 келі салмақтағы әлем чемпионын Шавкат Рахмоновтың бапкері Эдуард Базров та ерекше атап өтіп, бұл жеңістің Олимпиадада да үлкен үміт сыйлайтынын айтты.
Грек-рим күресінен әлем чемпионы атанған Айдос Сұлтанғалидың триумфы – Қазақстан спорты үшін жаңа серпіліс. UFC жұлдызы Шавкат Рахмоновтың бапкері Эдуард Базров бұл жеңістің елдегі күрес мектебі үшін ерекше маңызға ие екенін айтты.
Эдуард Базровтың айтуынша, Сұлтанғалидың Загреб төріндегі жеңісі – грек-рим күресінің дамуына үлкен серпін беретін сәт:
«Айдостың чемпиондық белдесуі бізді шын мәнінде қуантты. Бұл тек Қазақстан спорты үшін емес, әлемдік арена үшін де маңызды оқиға. Елде тек бокс пен ауыр атлетика емес, грек-рим күресі де жоғары деңгейде екенін дәлелдеді. Әсіресе, жас спортшылардың осылайша жеңіске жетуі – өскелең ұрпаққа үлкен үлгі. Оның үстіне Айдос Олимпиадалық салмақта топ жарды, ал бұл жерде бәсеке өте жоғары. Сондықтан Париж бен Лос-Анджелестегі ойындарға үлкен үміт артуға толық негіз бар», – деді бапкер Sports24.kz-ке берген сұхбатында.
Сұлтанғалидың жеңіс жолы
Айдос Сұлтанғали (60 кг) финалда өзбек балуаны Алишер Ғаниевті небәрі бір минутта таза жеңіспен ұтты. Бұл Қазақстанның грек-рим күресіндегі ХХІ ғасырдағы алғашқы «алтыны» болды. Соңғы рет мұндай жетістікті 1999 жылы Мхитар Манукян (63 кг) әкелген еді.
Жарыс барысында Сұлтанғали АҚШ, Израиль, Солтүстік Корея және Грузия балуандарын айқын басымдықпен ұтып, финалға дейін сүрінбей жетті.
Басқа қазақстандық балуандардың нәтижесі
- Мерей Маулетканов (72 кг) қола жүлде үшін белдесуде ирандық спортшыға жол беріп, бесінші орын алды.
- Ержет Жарлыкасын пен Ислам Евлоев ширек финалдан әрі аса алмады.
- Динмұхамед Қошқар жарысты алғашқы айналымда аяқтады.
- Париж Олимпиадасының жүлдегері Демеу Жадраев те бұл жолы медальсіз қалды.