Әлем чемпионы мен атышулы блогер баспасөз-конференциясында төбелес шығарды
Атышулы блогер Джейк Пол мен әлем чемпионы Джервонта Дэвис жекпе-жек алдындағы баспасөз мәслихатында төбелесіп кете жаздады.
Жекпе-жек алдындағы тартысты сәт
Netflix Sports әлеуметтік желісінде жарияланған бейнежазбада спортшылардың көз арбасу кезінде бір-бірін итеріп қалғаны анық көрінеді. Ұйымдастырушылар уақытылы араласып, шиеленісті тоқтатты.
Жекпе-жек 14 қараша күні өтеді. Рингке:
- WBA-Super белбеуінің иегері (жеңіл салмақта) Джервонта Дэвис;
- әлеуметтік желідегі атышулы жұлдыз әрі боксқа бет бұрған Джейк Пол шығады.
Айқас аралық салмақта – 88,5 кг дейін, 10 раундқа жоспарланған. Боксшылар 12 унциялық қолғап киіп шығады.
Бұл ресми жекпе-жек пе?
Ұйымдастырушылардың айтуынша, кездесу көрсетілімдік сипатта өтеді. Сондықтан ол боксшылардың ресми рекордына енбейді. Дегенмен айқасты үш төреші бағалап, жекпе-жек соңында жеңімпаз жарияланады.
Джейк Полдың тәжірибесі
Соңғы жылдары блогер рингте белсенді бой көрсетіп жүр. Ол ММА жұлдыздары Тайрон Вудли мен Бен Аскренмен айқасқан. Ал былтырғы жылы тіпті Майк Тайсонның өзімен жекпе-жек өткізіп, жеңіске жеткен. Бірақ бокс сарапшылары сол кезде Тайсонның рингке шықпағанына 20 жылға жуық уақыт өткенін ескерткен болатын.