Бокстан Қазақстан құрамасының бас бапкері Қайрат Сәтжанов Семейдегі ел чемпионатының қорытындысын шығарып, алдағы мақсаттар туралы айтты.
«Алты күнге созылған Қазақстан чемпионаты өз мәресіне жетті. Көп қызықты жекпе-жектер болды — екі салмақта нокаут тіркелді. Турнирде жас боксшылар көп болғанымен жеңіс тәжірибелі спортшылар жағында қалды», — деді Сәтжанов.
Бапкердің айтуынша, оның есінде ерекше сақталған жекпе-жек — Санжарәлі Бегәлиевтің жеңісі:
«Бірінші раундта Ерқанат Райысты нокаутқа түсіріп, сенсация жасады. Сол сәт мен үшін күтпеген жағдай болды.»
Қайрат Сатжановтың сөзінше, енді басты назар — оқу-жаттығу жиындарына аударылады.
«Бүгін таңертең жиналыс өткіздік. Жас боксшылар — Дәулет Төлемісов және өзге де жігіттер жастар құрамасынан ересектер қатарына өтуде. Дегенмен физикалық тұрғыдан әлі толық бейімделіп болған жоқ», — деді бас бапкер.
Сәтжанов 2025 жылғы чемпионатты былтырғымен салыстыра отырып, оның сапасы артқанын атап өтті:
«Былтыр нокаут тіркелмеген еді, ал биыл бірнеше шешуші айқас ерте аяқталды. Жас боксшылардың ішінде Нұрсұлтан Алтынбек секілді таланттар жақсы нәтиже көрсетті — кейбірі турнир барысында бес-алты жекпе-жек өткізді.»
31 қазан күні Алматы облысындағы «Жанашар» спорт базасында ұлттық құраманың оқу-жаттығу жиыны басталады. Онда төрт әлем чемпионы, жарақатынан толық айыққан Нұрбек Оралбай және Қазақстан чемпионатының барлық жеңімпаздары қатысады.
Бұл жиын жаңа құрамды халықаралық маусымға дайындауға бағытталмақ.