Әбиба мен Ғұсман бар: Әлемдік додада тағы кім ел намысын қорғайды?

Қазақстанның үздік дзюдошылары Әбиба Әбужақынова мен Ғұсман Қырғызбаев бастаған ұлттық құрама 28–30 қараша аралығында Абу-Дабиде өтетін Grand Slam (Үлкен дулыға) турниріне қатысады. Бұл дода маңызды рейтингтік кезеңдердің бірі.

Grand Slam жарысына әлемнің 80-ге жуық елінен спортшылар қатыспақ. Қазақстан ұлттық құрамасы бұл турнирге 14 спортшымен аттанағалы жатыр. Оның ішінде 3 әйел және 11 ер дзюдошы бар.

Әйелдер құрамасы

• 48 кг: Әбиба Әбужақынова — Азия чемпионы, әлемдік рейтингтің үздік ондығында.
• 57 кг: Бақыт Құсақбаева — жастар арасындағы Азия кубогының жеңімпазы.
• 63 кг: Эсмигүл Куюлова — халықаралық турнирлердің жүлдегері.

Әбиба бұл маусымда тұрақты нәтиже көрсетіп келе жатқан дзюдошылардың бірі. Оның Абу-Дабидегі Grand Slam турнирінде медальға таласу мүмкіндігі жоғары.

Ерлер құрамасы

• 60 кг: Мағжан Шамшадин, Аман Бақытжан
• 66 кг: Ғұсман Қырғызбаев, Нұрқанат Серікбаев
• 73 кг: Есет Қуанов
• 81 кг: Абылайхан Жұбаназар, Азат Құмысбай
• 90 кг: Ермахан Ануарбеков
• 100 кг: Нұрлыхан Шархан, Марат Байқамұров («Qazaqstan Barysy – 2025» чемпионы)
• +100 кг: Еламан Ерғалиев

Қазақстанның тәжірибелі спортшысы Ғұсман Қырғызбаев халықаралық деңгейдегі көпжылдық тәжірибесімен ерекшеленеді. Ол 2021 жылғы әлем чемпионатының күміс жүлдегері және ұлттық құраманың көшбасшыларының бірі саналады.