Суперауыр салмақтағы өзбек боксшысы Баходир Джалолов (16-0, 14 КО) келесі кездесуін 14 қараша күні Ташкентте өткізеді.
BoxRec.com дерегінше, Джалоловтың қарсыласы — жеңілістің дәмін татпаған нигериялық нокаутер Соломон Адебайо (14-0, 13 КО) болмақ. Кездесу сегіз раундқа жоспарланған.
Бұған дейін Баходир Джалолов 6 қазан күні Санкт-Петербургте (Ресей) шаршы алаңға шыққан еді. Ол Виталий Кудуховты (7-4, 3 КО) төрешілердің бір ауыздан берген шешімімен жеңген.
Ал нигериялық Соломон Адебайо соңғы рет 2024 жылдың 28 шілдесінде Лагоста (Нигерия) жұдырықтасып, бірінші раундта намибиялық Лукас Ндафолумуды (23-12, 11 КО) нокаутқа жіберген.
Джалолов пен Адебайо арасындағы айқас өзбек жанкүйерлері үшін жылдың ең қызықты жекпе-жектерінің бірі болмақ.