Қайрат Сәтжанов отставкадан кейін маңызды мәлімдеме жасады

"1,5 жыл бірге жұмыс істедік" 

Сәтжановтың айтуынша, 2024 жылдың тамызында Қазақстан бокс федерациясының президенті Шахмұрат Мүтәліп оны ұлттық құрамаға шақырып, ерлер командасын басқаруды ұсынған. Сол уақыттан бері тараптар шамамен бір жарым жыл бірлесе еңбек еткен.

Ол осы кезеңде нәтиже жаман болмағанын айтып, бірнеше халықаралық жетістікті тізіп шықты.

Сәтжановтың кезеңіндегі басты нәтижелер

Бапкер мәлімдемесінде төмендегі табыстарды ерекше атады:

• Испаниядағы ірі жарыста (2025 жыл) Қазақстан құрамасы командалық есепте 1-орын алды;
• Болгариядағы “Странджа” турнирінде (ақпан) Қазақстан командалық есепте жеңімпаз атанды;

Сәтжановтың сөзіне қарағанда, бұған дейін тәуелсіздік алғаннан бері бұл турнирде Қазақстан бар болғаны екі алтын иеленсе, осы жолы команда 5 алтын алып, жалпы есепте алға шыққан;

• Сербиядағы халықаралық турнирде — 1-орын;
• Нидерландтағы Эйндховен турнирінде — 1-орын;
• Ең ірі жетістік ретінде Англияның Ливерпуль қаласында өткен әлем чемпионатын атап өтті: онда Қазақстанның жасөспірімдер құрамасы (ұлдар мен қыздар) жалпы 7 алтын медаль жеңіп алды.

Тарихқа енген есімдер: Тәшкенбай, Махмұд және Оралбай

Сәтжанов бірқатар боксшының жеке жетістігіне де тоқталды:

• Санжар Тәшкенбай мен Сабырхан Махмұд — екі дүркін әлем чемпионы атанды;
• Бір әулеттен шыққан Махмұд Сабырхан мен Төрехан Сабырхан — әлем чемпионы болғанын айтты;
• Аса ауыр салмақта +92 кг дәрежесінде Айбек Оралбай да чемпион атанып, тарихқа енген.

Сондай-ақ Сәтжанов кейінгі IBA әлем чемпионатында Қазақстан боксшылары тағы 3 алтын алып, командалық есепте Ресейден кейін 2-орын иеленгенін еске салды.

2026 жыл: Азия чемпионаты, Әлем кубогының кезеңдері және басты мақсат

Бұрынғы бас бапкердің сөзінше, 2026 жыл да жауапты болады:

Наурызда — Азия чемпионаты;

Одан кейін — Әлем кубогының 1, 2, 3 кезеңдері;

Ең негізгі дода — қыркүйекте өтетін Азия ойындары.

Сәтжанов ұлттық құрама алтын медальдар алып, командалық есепте бірінші орынға шығатынына сенетінін айтып, шәкірттеріне сәттілік тіледі. 

Бүгін Қайрат Сәтжановтың Қазақстан ерлер құрамасының бас бапкері қызметінен кеткені хабарланды. Оның орнына Нұржан Насанов тағайындалды.

Еске сала кетейік, Сәтжанов бұл қызметке 2024 жылдың тамызында келген. Ол Париждегі Олимпиада-2024 ойындарындағы сәтсіз нәтижеден кейін бас бапкер қызметін атқарған Мырзағали Айтжановты алмастырған еді.