Флойд Мейвезер "Темір Майкпен" жұдырықтаспақ
Айтулы оқиға 2026 жылдың 27 маусымында өтеді. Спорт аңыздарының айқасы Афинадағы кештің хедлайнері болады.
2026 жылдың 27 маусымында Афинадағы Oaka Arena кешенінде Мейвезер жекпе-жек өткізеді. 48 жастағы бокс аңызы Флойд Мейвезер (50-0, 27 KO) "Аңыздар шайқасы" деп аталатын ірі турнирдің хедлайнері болады. Ал оның қарсыласы — "Темір Майк" атанған 45 жастағы Майк Замбидис. Ол әлемдік кикбоксингтің тірі аңызы әрі Грекияда жекпе-жек спортының танымал өкілі саналады.
Негізгі деректер:
- Кикбоксингтегі рекорды: 180 жекпе-жек, 158 жеңіс (87 нокаут)
- Стилі: үздіксіз прессинг, қуатты оверхендтер, тізе соққылары
- Бокстағы тәжірибесі: 2019 жылы кәсіпқой бокста дебют жасап, Антонио Гоместі жеңді
Мейвезердің алдыңғы қарсыластарымен (блогерлер мен шоу-файтерлерден) салыстырар болсақ — Замбидис кәсіпқой спортшы. Соған қарамастан, таза бокс ережесінде 45 жастағы Замбидистің 48 жастағы Мейвезерге қарсы мүмкіндігі аса көп емес.
Олимпиада отанындағы бизнес-жоба
Афинаның таңдалуы бекер емес. Бұл – SEAJETS компаниясы мен грек промоутерлерінің стратегиялық шешімі. Мейвезер өзінің брендін әлемдік деңгейдегі бокс кештері сирек өтетін елдерде монетизациялауға тырысады.
Грекия үшін Флойдтың келуі — өте ауқымды оқиға. Турнир тек бір жекпе-жекпен шектелмейді: кардта әлем чемпиондығы үшін екі титулдық айқас жоспарланған (қатысушылар кейінірек жарияланады). Бұл "Аңыздар шайқасын" жай ғана ардагерлер шоуы емес, нағыз спорттық ивентке айналдырады.
Мейвезер соңғы рет қашан айқасты?
Еске салайық, Мейвезердің соңғы жекпе-жегі 2024 жылдың тамызында Мехикода Джон Готти III-ке қарсы өтті. Сол айқас жанжалға ұласа жаздады: Флойд жекпе-жек ортасында төрешіні ауыстыруды талап еткен болатын