Бақыт Сәрсекбаевтың шәкірттері Таиландқа қазы-қартасыз аттанды
Бокстан Қазақстанның 19 жасқа дейінгі (U-19) жастар құрамасы Бангкокке World Boxing Futures Cup-2026 турниріне жол тартты.
Таиландтағы турнир: Қазақстаннан 19 боксшы барады
World Boxing ұйымының қолдауымен өтетін жастар бәсекесі 8–15 наурыз аралығында Таиландта ұйымдастырылады. Қазақстан намысын бұл додада 19 боксшы қорғайды: 10 ұл және 9 қыз.
Жастар командасының аға бапкері Бақыт Сәрсекбаев Instagram парақшасында боксшылармен бірге түскен суретін жариялап, оқырманына жылы жаңалығын жариялады. Оның айтуынша, бұл жолы бұрыннан қалыптасқан бір әдетінен бас тартқан:
"Ендеше, кеттік! Бұл жолы базарға барып қазы алғаным жоқ — демеушілерге рахмет! Жастарға сәттілік тілейік, достар", — деп жазды Сәрсекбаев.
Бұл жазба әлеуметтік желіде қызу талқыланып, жанкүйерлер жастарға сәттілік тіледі.
Бапкерлік тағайындау және бұрынғы “40 келі қазы” оқиғасы
Еске сала кетейік, Бақыт Сәрсекбаев 10 қаңтарда Қазақстанның U-19 құрамасына аға бапкер болып тағайындалған. Бұған дейін U-22 құрамасын басқарды.
2025 жылдың жазында U-22 командасы World Boxing аясында Шри-Ланкада тарихтағы алғашқы Азия чемпионатына қатысқан еді. Сол сапарда Бейжің Олимпиадасының чемпионы Сәрсекбаев боксшыларына арнайы 40 келі қазы алып барғаны көптің есінде.