Шавкат Рахмонов себеп. Ислам Махачев Иэн Гэрримен айқасудан бас тартты
Иэн Гэрридің Шавкат Рахмоновтан жеңілуі маңызды фактор ретінде аталды.
UFC-дің жартылай орта салмақтағы чемпионы Ислам Махачев ықтимал қарсыластарының арасынан Иэн Гэрриді емес, Майкл Моралесті таңдауға бейіл. Оның сөзінше, мұндай шешімге Шавкат Рахмоновтың ирландиялық файтерді бұған дейін жеңгені себеп.
Ислам Махачев Red Corner MMA YouTube-арнасына берген сұхбатында титулдық жекпе-жекке ықтимал қарсылас ретінде Иэн Гэрри мен Майкл Моралестің кандидатурасын салыстырды.
Махачев неге Моралесті таңдайды?
Махачевтің айтуынша, спорттық мұра және жеке бедел тұрғысынан алғанда, жеңілмеген эквадорлық Майкл Моралес оған жақсы қарсылас.
"Егер Моралес пен Иэннің арасынан таңдау керек болса, шынымды айтсам, өз атым мен мұрам үшін Моралесті таңдар едім. Неге? Өйткені ол әзірге жеңілмеген. Ал ертең Иэн Гэрриді жеңсең, жұрт: "Оны бірнеше жекпе-жек бұрын Шавкат Рахмонов жеңген" деп айтады", — деді Махачев.
Шавкат Рахмонов Гэрриді қалай жеңген еді?
Шавкат Рахмонов пен Иэн Гэрри арасындағы жекпе-жек 2024 жылдың 8 желтоқсанында Лас-Вегаста өткен UFC 310 турнирінде ұйымдастырылған. Бұл кездесу кештің екінші басты оқиғасы болды.
Бес раундқа созылған айқаста қазақстандық файтер қарсыласынан басым түсіп, төрешілердің бірауыздан шешімімен жеңіске жетті. Бұл кездесу әзірге Шавкат Рахмоновтың UFC-дегі соңғы жекпе-жегі болып отыр.