Абылайхан Жүсіпов пе, Төрехан Сабырхан ба? BoxRec "қазақ салмағындағы" үздікті атады
Жуырда BoxRec статистикалық порталы әуесқой бокстағы жаңартылған рейтингін жариялады.
BoxRec статистикалық порталы әуесқой бокстағы бірінші орта салмақ бойынша әлемнің үздік боксшыларының жаңартылған рейтингін жариялады. Бұл тізімде қазақстандық Абылайхан Жүсіпов Төрехан Сабырханды басып озып, әлемдік рейтингтің көшін бастады.
Қытайдың Гуйян қаласында өткен World Boxing Әлем кубогының екінші кезеңінде топ жарған Абылайхан Жүсіпов бірінші орта салмақтағы ең үздік әуесқой боксшы деп танылды.
Төрехан Сабырхан төртінші орынға түсті
World Boxing нұсқасы бойынша 2025 жылғы әлем чемпионы Төрехан Сабырхан BoxRec рейтингінде төртінші орынға орналасты.
Оның позициясына 2026 жылғы Азия чемпионатының финалындағы жеңілісі әсер еткен болуы мүмкін. Сол шешуші айқаста Төрехан иорданиялық Зияд Ешааштан ұтылып, ересектер арасындағы мансабындағы алғашқы жеңілісіне тап болған еді.
Дегенмен Сабырхан әлі де осы салмақтағы Қазақстан боксының басты өкілдерінің бірі саналады. Оның әлем чемпионы атағы мен халықаралық тәжірибесі ұлттық құрама үшін маңызды фактор болып қала береді.
Азия ойындарына кім барады?
Қазір бокс ортасында 2026 жылғы Азия ойындарына бірінші орта салмақта Қазақстан атынан кім барады деген сұрақ жиі талқыланып жатыр.
Абылайхан Жүсіповтің BoxRec рейтингінде бірінші орынға көтерілуі бұл бәсекені одан әрі күшейтті. Ал Төрехан Сабырханның әлем чемпионы мәртебесі де оны негізгі үміткерлер қатарында қалдырады.
Қазақстан құрамасының бапкерлер штабы бұл мәселе бойынша түпкілікті шешімді кейін қабылдайды.
Бұл салмақ Қазақстан үшін тарихи мәнге ие
Бірінші орта салмақ Қазақстан боксы үшін ерекше маңызға ие. Себебі дәл осы салмаққа жақын категорияларда қазақстандық боксшылар Олимпиада ойындарында бірнеше рет қатарынан алтын медаль жеңіп алған.
- 2000 жылы Сидней Олимпиадасында Ермахан Ибраимов 71 келіге дейінгі салмақта чемпион атанды;
- 2004 жылы Афинада Бақтияр Артаев 69 келіде топ жарды;
- 2008 жылы Бейжіңде Бақыт Сәрсекбаев;
- 2012 жылы Лондонда Серік Сәпиев;
- 2016 жылы Рио-де-Жанейрода Данияр Елеусінов осы салмақта Қазақстанға алтын медаль сыйлады.