Қазақстан ерлер арасындағы алғашқы финалда Өзбекстаннан жеңіліп қалды (ВИДЕО)
Қазақстандық боксшы Әділ Асқанбай Джакартада өтіп жатқан жастар арасындағы Азия чемпионатының финалында есе жіберді.
Индонезия астанасы Джакартада бокстан жастар арасындағы Азия чемпионатының ерлер арасындағы финалдық жекпе-жектері басталды. Қазақстан құрамасының өкілі Әділ Асқанбай 19 жасқа дейінгі спортшылар арасында 50 келіге дейінгі салмақта алтын медаль үшін рингке шықты.
Шешуші жекпе-жекте Әділ Асқанбай Өзбекстан боксшысы Уткизбек Нозкосимовпен жұдырықтасты. Оның қорытындысы бойынша төрешілер бірауыздан Өзбекстан өкілінің жеңісін тіркеді. Есеп — 5:0.
Осылайша Әділ Асқанбай финалда жеңіліп, жастар арасындағы Азия чемпионатының күміс жүлдегері атанды.
Қазақстаннан 13 боксшы финалға шықты
Ерлер құрамасынан барлығы 13 қазақстандық боксшы финалға жолдама алды.
Олардың алтауы — 19 жасқа дейінгі спортшылар арасында, ал жетеуі — 23 жасқа дейінгі боксшылар санатында алтын медаль үшін жұдырықтасады.
Турнир 16 шілдеде аяқталады
Жастар арасындағы Азия чемпионаты Джакартада өтіп жатыр. Құрлықтық дода 16 шілде күні аяқталады.