Қазақстандық файтер Артем Тарасовқа қарсы шығады
Айқас 19 қыркүйекте Алматыдағы Балуан Шолақ атындағы Спорт сарайында өтеді.
Naiza лигасы қазақстандық файтер Нұрхан Мүбаракпен пен ресейлік танымал блогер әрі поп-ММА өкілі Артем Тарасовтың Алматыда өтетін жекпе-жегін ресми түрде жариялады. Айқас 19 қыркүйекте Балуан Шолақ атындағы Спорт сарайында өтеді.
Жекпе-жек келісілген салмақта өтеді
Промоушен мәліметінше, кездесу келісілген салмақ дәрежесінде өтеді. Нұрхан Мүбарак үшін бұл Naiza лигасындағы дебют болмақ. Оның жалаң жұдырықтағы көрсеткіші – 2 жеңіс және 1 жеңіліс.
Naiza баспасөз қызметі Артем Тарасовтың мансабындағы статистикаға да назар аударды.
"Артем Тарасов – таныстыруды қажет етпейтін есім. Кәсіпқой мансабындағы 17 жеңістің 14-ін сабмишн арқылы алды. Оның бірде-бір жеңісі төрешілер шешіміне дейін жеткен жоқ", – делінген лига хабарламасында.
Промоушен бұл кездесудің де мерзімінен бұрын аяқталуы мүмкін екенін меңзеді.
Нұрхан Мүбарак дебютте сенсация жасай ала ма?
Naiza өкілдері алдағы жекпе-жекті тәжірибелі Тарасов пен лигадағы алғашқы кездесуін өткізетін қазақстандық файтердің текетіресі ретінде таныстырды.
"Бұл жекпе-жекте не күтеміз: Тарасовтың кезекті финиші ме, әлде жаңа жұлдыздың жарқ еткен жеңісі ме?" – деп жазды промоушен.
Айта кетейік, Naiza 85 кешінің негізгі оқиғасында Жансерік Жақсығұлұлы мен Мири Садыгов кездеседі.