Садриддин Ахмедовтың жаңа жекпе-жегі жарияланды
Қазақстандық боксшының қарсыласы америкалық Рафаэль Игбокве (17-5, 7 КО) болады.
Садриддин Ахмедов (14-0, 12 КО) 13 желтоқсан күні Калифорния штатының Санта-Инез қаласындағы Chumash Casino аренасында өтетін бокс кешінде өнер көрсетеді. Оның қарсыласы америкалық Рафаэль Игбокве (17-5, 7 КО) болады. Бұл туралы "Спорт Шредингера" хабарлады.
32 жастағы Игбокве 2021 жылы болашақ уақытша әлем чемпионы Сергей Богачукпен жекпе-жекте жеңіліс тауып, бір жарым жыл үзіліс жасады. Оралғаннан кейін Игбокве болашақ WBA чемпионы Исраил Мадримовпен ұтылды. Мадримов сол жеңісінен кейін титулдық жекпе-жекке шықты.
26 жастағы Ахмедов Санта-Инезде бұған дейін де жекпе-жек өткізген болатын. Ол 31-ші тамызда АҚШ-тағы дебюттік кездесуінде қарсыласын екінші раундта нокаутқа түсірді.
Қазіргі уақытта Ахмедов Геннадий Головкиннің промоутері Том Леффлердің ұйымдастырған кардтарында өнер көрсетуде. Садриддинді жаңа жекпе-жекке Головкиннің бұрынғы бапкері Абель Санчес дайындауда.