Қазақ еліне +1 легионер: Ресейлік балуан қыз Қазақстанға жүлде әперді
Красноярск қаласында өтіп жатқан Иван Ярыгин Кубогында қазақстандық Виктория Хусаинова күміс медаль жеңіп алды.
62 келі салмақта белдескен ол Ресей намысын қорғап келді. Виктория Хусаинова 2018 жылы Будапештте өткен 18 жасқа дейінгі спортшылар арасындағы әлем чемпионатында топ жарған. 2022 жылы 21 жасқа дейінгі балуандар арасында Ресей чемпионы.
Ол 2022 жылдан кейін Қазақстанға қоныс аударды. 2024 жылы Таразда өткен Қазақстан кубогында жеңіске жетіп, финалда тәжірибелі Ирина Казюлинадан басым түсті.
"Хусаинова Ресейде айтарлықтай жеңіске жетпеген спортшы. Оның таланты біздің елге келіп ашылып жатқандай. Ярыгин турнирінде финалға шығады деп өзіміз де ойламадық. Осы жарыста өзін жақсы жағынан көрсеткен соң, алдағы бәсекелерде де оған сенім артамыз", — дейді әйелдер күресінен Қазақстан командасының бас бапкері Қайрат Сағадиев.