Баходир Джалолов Астанадағы бокс кешінде жекпе-жек өткізеді – қазақстандық қарсылас табылды
Өзбекстандық суперауыр салмақтағы боксшы Баходир Джалолов 5 сәуір күні Астанада өтетін кәсіпқой бокс кешінде рингке шығады. Бұл туралы өзбек журналисі Жалол Ахмедов хабарлады.
Ахмедовтың мәліметінше, Баходир Джалолов 5 сәуірде Астанада өтетін бокс кешінің андеркардында жұдырықтасады. Кештің басты айқасы қазақстандық Жәнібек Әлімханұлы мен француздық Анауэль Нгамиссенге арасындағы жекпе-жек болады.
Джалоловтың қарсыласы кім?
Спорттық шараға дайындық барысында Джалоловтың қазақстандық боксшымен кездесуі мүмкін екені айтылды. Журналист Иван Дычкомен жекпе-жек өткізу туралы пікірталас қозғалғанын атап өтті:
"Баходир Джалолов 5 сәуірде Астанаға оралады және Әлімханұлы мен Нгамиссенге айқасының андеркардында өнер көрсетеді! Пресс-конференцияда оның Иван Дычкомен кездесуі туралы ұсыныс көтерілді. Біз бұл ортаазиялық мега-жекпе-жекті көре аламыз ба?" – деп жазды Ахмедов әлеуметтік желіде.