Шавкат Рахмоновтың UFC-дегі келесі жекпе-жегі туралы ресми мәлімдеме жасалды (ВИДЕО)
Қазақстандық UFC жұлдызы, жеңіліссіз өнер көрсетіп келе жатқан Шавкат Рахмонов келесі жекпе-жегіне қызу дайындалып жатыр.
DarProTeam өзінің Instagram парақшасында спортшының дайындық процесінен үзінділермен бөлісіп, былай деп жазды:
"Жоспар бойынша дайындық жүріп жатыр!
Шавкат Рахмонов алдағы жекпе-жекке қарқынды түрде дайындалуда. Жаттығулар жоғары деңгейде өтуде. Біздің команда барлық аспектілер бойынша жұмыс істеп, файтердің үздік формада октагонға шығуын қамтамасыз етеді. Шавкат толықтай шоғырланған, мотивациясы жоғары және жанкүйерлерге әсерлі жекпе-жек сыйлауға дайын!"
Еске сала кетейік, бұған дейін Шавкат Рахмоновтың менеджері спортшының жарақатына байланысты жартылай орта салмақтағы чемпион Белал Мұхаммадқа қарсы титулдық жекпе-жектен бас тартқанын мәлімдеген.
UFC ұйымының шешімі бойынша, Белал Мұхаммад 10 мамырда UFC 315 турнирінің басты жекпе-жегінде австралиялық Джек Делла Маддаленамен кездеседі.
UFC президенті Дана Уайттың мәлімдеуінше, бұл кездесудің жеңімпазы "Номад" лақап атымен танымал Шавкат Рахмоновпен чемпиондық белбеуді қорғау үшін жекпе-жек өткізеді.