"Былық боп жатыр": Жәнібек Әлімханұлының жекпе-жегіне қатысты сын айтылды
5 сәуір күні Астанада өтетін WBO және IBF нұсқалары бойынша орта салмақтағы әлем чемпионы Жәнібек Әлімханұлы мен Францияның үміткері Анауэль Нгамиссенге арасындағы жекпе-жекке қатысты сарапшылар пікір білдірді.
Азия боксы туралы жарыса жазып жүрген Asianboxing.info порталы алдағы тартысқа сыни көзқарас танытты. Журналистердің пайымынша, орта салмақтағы қазіргі жағдай "былыққа толы" деп сипатталып отыр.
Орта салмақта үздік қарсыластар жетіспейді
Жәнібек Әлімханұлы (16-0, 11 КО) 5 сәуірде француз Анауэль Нгамиссенгеге (14-0, 9 КО) қарсы өзінің чемпиондық белбеулерін қорғайды. Конгода дүниеге келген Нгамиссенге бұл мүмкіндікті орта салмақтың осалдығының арқасында алғаны атап өтілді.
"Орта салмақта нақты мықтылар жоқ. Әлімханұлы екі чемпиондық белбеуге ие болса да, көзге түсетін бірде-бір айқын жеңісі жоқ. Бұл салмақта өзіне лайық қарсылас табу – қиынның қиыны", – деп жазады портал.
Француз – аты бар, заты шамалы боксшы
Сарапшылардың айтуынша, Нгамиссенгенің жеңіліссіз рекордына қарамастан ол чемпиондық жекпе-жекке лайық деп есептелмейді. Француз боксшысы тек үш рет алты раундтан ұзақ айқасқа шыққан. Ең ірі жеңісі – Польшада өткен 8 раундтық кездесуде Федор Черкашинді ұтқаны ғана.
"Ол бұл мүмкіндікке лайық ештеңе істеген жоқ. Сондықтан бұл кездесу айқын фаворитпен өтетін теңсіз жұптасу болмақ", – делінген талдауда.
Жәнібек үшін туған жерде жекпе-жек өткізу маңызды
Сарапшылар жекпе-жектің интрига жағынан әлсіз екенін мойындаса да, Қазақстан үшін бұл сирек болатын тарихи сәт екенін атап өтті.
"Бұл айқас Қазақстандағы жанкүйерлер үшін әлем чемпионаты деңгейіндегі жекпе-жекті көрудің тамаша мүмкіндігі. Жәнібек өзінің туған жерінде сегіз жылдан бері алғаш рет жұдырықтасқалы отыр", – деп қосты Asianboxing.info.