Махмұд Сабырханның дебюттік жекпе-жегіне бір күн қалғанда қарсыласы ауысты
Қазақстандық боксшы Махмұд Сабырханның кәсіби рингтегі дебюттік жекпе-жегіне бір күн қалғанда қарсыласы ауысып кетті.
Бастапқыда Сабырхан Колумбия елінің жеңіліп көрмеген өкілі Николас Тордесильямен (2-0, 2 КО) жұдырықтасуы тиіс болатын. Бірақ ұйымдастырушылардың шешіміне сәйкес, жаңа қарсылас ретінде вьетнамдық Данг Дак Хайнх (2-1, 2 КО) таңдалды.
Бұл өзгеріс жекпе-жекке небәрі бір күн қалғанда жарияланды.
Сабырханның алғашқы кәсіби жекпе-жегі 5 сәуір күні Астанада өтетін кәсіби бокс кеші аясында ұйымдастырылады.
Бокс кешінің басты оқиғасы – WBO және IBF тұжырымдары бойынша орта салмақтағы әлем чемпионы Жәнібек Әлімханұлының (16-0, 11 КО) франциялық Анауэль Нгамиссенгемен (14-0, 9 КО) жекпе-жегі болады. Бұл кездесуде екі чемпиондық белбеу сарапқа салынады.