Кейбір ойыншылар бірнеше сағат бойы тергелген.
Сыбайлас жемқорлыққа қарсы іс-қимыл агенттігі шымкенттік «Ордабасы» футбол клубының ойыншыларына қатысты тергеу жұмыстарын бастады. Бұл туралы aladop.kz хабарлады. Дереккөздің айтуынша, агенттік командадағы барлық футболшыны – шетелдік легионерлер мен жергілікті ойыншыларды бірдей сұрақтың астына алған. Кейбір ойыншылар бірнеше сағат бойы тергелген.
Клуб былтыр сыбайлас жемқорлық фактілеріне байланысты күдікке ілінген. Осыны негізге алған Антикор қазіргі таңда тергеу-тексеру шараларын жүргізіп жатыр. Тергеу аясында футболшылардың келісімшарттары, жалақысы, бонустары мен клуб бюджетінен бөлінген қаражаттар тексерілуде.
Естеріңізге салсақ, бұған дейін «Ордабасы» капитаны Асхат Тағыбергеннің жалақысы қоғам арасында үлкен дау тудырған болатын. Шымкент қаласының әкімі Ғабит Сыздықбеков клубтағы жалақы жүйесіне және қаржы жұмсау саясатына байланысты бірқатар былықтарды жария етіп, қоғамда резонанс тудырған еді.
