"Жетісу" футбол клубының бас бапкері Самат Смақов Қазақстан футбол федерациясының (ҚФФ) төрт матчқа шеттету туралы шешіміне наразылық білдірді.
Қазақстан Премьер-лигасының 5-турында "Жетісу" мен "Ордабасы" арасындағы ойында Самат Смақов төрешіге наразылық білдіріп, қызыл қағаз алған болатын. Матчта шымкенттік команда 1:0 есебімен жеңіске жеткен.
Ойын соңындағы бас бапкердің әрекеті ҚФФ тәртіптік комиссиясының қарауына түсіп, нәтижесінде ол төрт матчқа шеттетілді.
"Алда команда үшін аса маңызды ойындар бар. Ал олар мені шындық үшін жазалады. Бұл әділетті деп ойламаймын. Бірақ жылап, шағымданып, кешірім сұрайтын ниетім жоқ. Иә, 25 сәуірде өтетін аңыздар матчына қатыспаймын. Постер мен жарнамалардан мені алып тастасын", — деді Самат Смақов.
Самат Смақовтың мәлімдемесі жанкүйерлер арасында үлкен резонанс тудырды. Бірі оны ашық ойлайтын және әділетсіздікпен күресетін бапкер ретінде бағаласа, енді бірі эмоцияға беріліп, команданы қиын сәтте тастап кетті деп сын айтты.
