Волейболдан "Ақтөбе" ерлер командасы Азия чемпиондар лигасының топтық кезеңіндегі алғашқы ойынында жеңіске жетті. Турнир Жапонияның Осака қаласында өтуде. Ақтөбеліктер Австралия чемпионы – "Куинслэнд Пайрэтс" командасымен жолықты.
"Ақтөбе" толығымен басымдық танытып, үш сетте қатарынан жеңіске жетті. Бұл нәтиже команда үшін Азия біріншілігіндегі сенімді бастаманың көрінісі болды.
Келесі кездесу 13 мамыр күні өтеді. Бұл жолы қазақстандық клуб Жапонияның мықты ұжымдарының бірі – "Сантори Санбердс" командасымен бақ сынайды. Бұл матч турнир тағдырын шешуде маңызды рөл атқармақ.
А тобында үш команда бақ сынайды. Ең жоғары екі орынды иеленген ұжымдар 15 мамырда өтетін ширек финалға жолдама алады. Жартылай финал 17 мамырға жоспарланса, финалдық матч пен үшінші орын үшін ойын 18 мамырда өтеді.
Айта кетейік, бұл – "Ақтөбе, клубының Азия чемпиондар лигасындағы алғашқы маусымы. Қазақстан біріншілігінде күміс жүлдеге ие болған олар Суперкубокты жеңіп, құрлықтық додаға қатысу құқығына ие болды.
