Мохамед Салах сенімділік пен жайлылықты таңдайды, бірақ суперкарлардан да бас тартпайды (ФОТО)
"Ливерпуль" шабуылшысы автоколлекциясына жеті сәнді көлік жинаған. Олардың әрқайсысы – оның мінезі мен талғамының айнасы.
Мохамед Салах 11 сәуірде “Ливерпульмен” келісімшартын ұзартты. Бұл шешім оның клубқа деген адалдығын ғана емес, Премьер-лигадағы ең жоғары жалақы алатын ойыншылардың біріне айналғанын білдіреді. The Times басылымының деректеріне сүйенсек, Салах аптасына жарты миллион фунтқа жуық табыс табады.
Осындай табыспен Мохамед Салахтың автопаркі де әсерлі болмауы мүмкін емес. Бірақ оның таңдауы тек қымбаттықты ғана емес, сенімділік пен стильді де ескереді.
1. Bentley Continental GT — £160,000
Салахтың сүйікті көліктерінің бірі. Бұл британдық люкс-класс гранд-турері өзінің әсем дизайнымен және 6.0 литрлік W12 қозғалтқышының қуатымен ерекшеленеді. 100 км/сағ жылдамдыққа небәрі 4 секундта жетеді. Бұл көлікті футболшы жиі үйінің маңында және “Ливерпульдің” Киркбидегі базасында жүргізіп жүргені байқалған.
2. Bentley Bentayga — £170,000
Күнделікті қатынасқа арналған мінсіз таңдау. Bentayga — әлемдегі ең қуатты әрі сәнді жол талғамайтын көліктердің бірі. Ол қала ішінде де, трассада да өзін сенімді ұстайды. Салон ішінде премиум материалдар мен заманауи технологиялар үйлесім тапқан.
3. Lamborghini Aventador — £270,000
Ерекше күндер мен көңіл күйге байланысты суперкар. Атмосфералық V12 қозғалтқышы 700+ ат күшіне ие, ал 100 км/сағ жылдамдыққа 2,9 секундта жетеді. Бұл — Салахтың гаражындағы ең агрессивті әрі көз тартар көлік.
4. Porsche 911 Turbo S — £180,000
Классиканы бағалайтындар үшін идеал. Porsche 911 — неміс автосының аңызы, ал Turbo S нұсқасы — ең жылдамдарының бірі. 640 ат күшіне ие 3.8 литрлік қозғалтқышы бар бұл көлік 2,7 секундта “жүздікке” шығады.
5. Mercedes-Benz SLS AMG Roadster — £175,000
Статустың белгісі ретінде мінетін кабриолет. Coupe нұсқасындағы «шағала қанаты» есіктерімен танымал SLS AMG Roadster де көркімен және 6.2 литрлік V8 қозғалтқышының үнімен таңғалдырады. Қазір өндірістен алынғандықтан, бұл модель сирек әрі құнды.
6. Mercedes-Benz AMG GLE Coupe — £65,000 бастап
Салауатты өмір салты мен отбасылық сапарлар үшін жақсы таңдау. GLE Coupe қуатты, кең әрі толық жетекті. Қала ішінде де, ұзақ жолда да өзін сенімді ұстай алады.
7. Audi Q7 — £67,000 бастап
Салах автопаркінің ”жұмысшы көлігі”. Сенімділік, жайлылық және кең салон — бұл көлікті күнделікті қолдануға мінсіз етеді. Q7 — отбасы үшін де, кәсіби сапарлар үшін де таптырмас шешім.