Хэмилтон Ferrari-ді қайта жасақтамақ: 2026 болид қалай өзгереді?
Ferrari-ге келген Льюис Хэмилтон үшін бұл маусым оңай болған жоқ. Жеті дүркін әлем чемпионы жаңа командаға тез бейімделе алмай, бірқатар қиындықтарға тап болды.
Ferrari басшысы Фредерик Вассёр де: «Біз оның жаңа командаға келгенде қанша күш жұмсау керегін дұрыс бағаламадық», – деп мойындады.
Хэмилтонның талаптары
Хэмилтон маусым бойы көлікті өз стиліне бейімдеуге тырысып жүр. Ол Ferrari басшылығына арнайы жазбаша ұсыныстарын беріп, келесі маусымға дайындықта назар аудару қажет бірнеше мәселені атап өтті:
- Тежегіш жүйесі – мотор тежегіші оның үйренген стиліне сәйкес келмейді.
- Руль мен алдыңғы бөлік – көлік кейде бұрылыстарда андерстирге ұшырайды.
- Сетаптар – Ferrari шектеулі нұсқаларды қолданатындықтан, Льюис өзіне қолайлы теңшеулерді табуда қиналып жүр.
Леклермен айырмашылық
Командадағы әріптесі Шарль Леклермен салыстырғанда, Хэмилтон жиі өзгеше шешім қабылдайды. Леклер дәстүрлі әрі тұрақты сетаптарды таңдаса, Льюис көліктің артқы бөлігін тұрақтандыруға көбірек көңіл бөледі. Бұл айырмашылық деректермен бөлісуді де қиындатады.
2026 маусымына күдік
Ferrari қазірдің өзінде жаңа регламент бойынша 2026 жылғы көлікті жобалап жатыр. Бірақ Хэмилтон мен Леклердің әртүрлі талаптары команданың дұрыс бағытты таңдауда қиындық тудыруы мүмкін.