Қазақстанда ақылы жолдармен кімдер тегін жүре алады?
Қазақстанда бірқатар көлік санаттарына ақылы трассалармен тегін жүру құқығы берілген.
2025 жылғы 22 ақпанда Қазақстан Республикасы Көлік министрінің "Қостанай – Ресей Федерациясы шекарасы (Троицкке бағыт) автожолының ақылы негізде пайдаланылуы туралы" бұйрығы күшіне енді (2025 жылғы 12 ақпанда жарияланған).
Министрлік мәліметінше, бұл жол 2-ші және 3-ші техникалық санаттағы ақылы автожол болып саналады. Бірақ жеңіл көліктер бұл жолмен тегін жүре алады.
Ақылы жолдармен тегін жүретін көлік санаттары
1. Қызметтік міндетін атқарып жүрген арнайы көліктер
- Жедел жәрдем машиналары
- Авариялық-құтқару қызметі көліктері
- Құқық қорғау органдарының автокөліктері
- Көліктік бақылау органдарының көліктері
- Арнайы мемлекеттік органдардың көліктері
- ҚР Қарулы Күштері, басқа да әскери бөлімдер мен құрылымдардың көліктері
2. Жол қызметіне және жолаушылар тасымалына арналған көліктер
- Ұлттық оператордың ақылы жолдарды күтіп-ұстау және техникалық қызмет көрсетуге арналған көліктері
- Концессиялық компаниялардың заңнамаға сәйкес белгілі бір ақылы учаскені күтіп-ұстау мақсатында пайдаланатын көліктері
- Жануарлар дүниесін қорғау және бақылау жөніндегі уәкілетті органның көліктері
- Қала маңы бағытында тұрақты жолаушы және жүк тасымалдайтын автобустар, сондай-ақ ақылы жолдың маңында орналасқан елді мекендерді аудандық, облыстық орталықтармен, астанамен немесе республикалық маңызы бар қалалармен байланыстыратын автобустар
- Ақылы жолға іргелес аудандардағы тіркелген автобустар, бір ауданның ішінде жүруге арналған
- Жүк көліктері, дөңгелекті ауыл шаруашылығы және мелиоративтік техникалар, жақын маңдағы көлік айырықтары арасындағы жол бөліктерінде өзен-көлдер мен теміржолдарды кесіп өту үшін пайдаланылатын көліктер
- Ақылы жолға жақын аудандарда тіркелген жеке және заңды тұлғалардың жеңіл автокөліктері, бір аудан ішінде қатынау үшін
3. Ұлы Отан соғысы ардагерлерінің жеңіл көліктері
Қазақстанда ақылы жолдармен тегін жүруге рұқсат етілген көліктердің тізімі заңнамаға сәйкес бекітілген. Егер сіз осы санаттардың біріне жататын көлік иесі болсаңыз, ақылы трассаларды тегін пайдалану құқыңыз бар.