"Боруссия" ойыншысы ішімдік үшін негізгі құрамнан шеттетілді

Менхенгладбахтық «Боруссия» клубының жартылай қорғаушысы Флориан Нойхаус команданың негізгі құрамынан уақытша шеттетілді. Бұл туралы клубтың баспасөз қызметі ресми мәлімдеме жасады.

Даудың басы – Майоркадағы демалыс

Bild басылымының хабарлауынша, футболшы демалыс уақытында Майоркада болған. Желіде тараған видеожазбада Нойхаус мас күйінде жанкүйерлермен сөйлесіп, өз жалақысына қатысты әжуалы пікір айтқан. Сонымен қатар, видео барысында клубтың спорт директоры туралы «әлемдегі ең нашар менеджер» деген сын естіледі. Флориан бұл сөздің нақты авторы болмаса да, оған күлкімен жауап берген.

Клубтың ұстанымы

«Флориан Нойхаустың әрекеті мен сөздері клубтың беделіне зиян келтіріп, біздің құндылықтарымызбен мүлде сәйкеспейді. Бұл мәлімдемелер клуб мүшелерін қатты ренжітті», – деді «Боруссия» клубының бас директоры Штефан Штегеманн.

Жаза – бір айға шеттету

Қазіргі таңда 27 жастағы футболшы клубтың негізгі құрамынан бір ай мерзімге шеттетілді. Осы уақыт ішінде ол командамен бірге жаттыға алмайды және ресми кездесулерге қатыспайды.