Жаңа маусым Қазақстан суперкубогынан басталмақ.
Қазақстан футбол федерациясының (ҚФФ) турнирлерді ұйымдастыру жөніндегі директоры Бақытжан Пазылхайыр AmanVIBE YouTube-арнасына берген сұхбатында Қазақстан Суперкубогының өтетін күнін, сондай-ақ ҚПЛ-2026 маусымының басталу және аяқталу мерзімдерін атады.
"Біз жаңа жылға дейін клуб басшыларымен жиналыс өткізіп, ескерттік: "Әріптестер, біздің жоспарымыз бойынша 28 ақпанда Суперкубокпен маусымды бастағымыз келеді. Бұл чемпионаттың бастауы болғандықтан, оны Астанада өткізуді жөн көрдік".
"Алғашқы тур 7–8 наурыз күндеріне жоспарланған. Бұдан бөлек, ФИФА-ның халықаралық үзілісіне дейін үш тур өткізуді көздеп отырмыз. Соңғы турларға қатысты әзірге талқылаулар жүріп жатыр — жуырда ұлттық құрамалар департаментінің директорымен бұл мәселені талқылап, олардың ұсыныстарын тыңдадық. Чемпионаттың ортасында жолдастық матчтар өтеді, сондай-ақ Ұлттар лигасы бар. Осы факторлардың барлығын ескере отырып, маусымды қарашаның басында аяқтаймыз деп ойлаймын. Мерзімі осы маусыммен шамалас, бірақ сәл кешірек болуы да мүмкін", – деді Пазылхайыр.
Айта кетейік, жаңа маусымда Қазақстан Премьер-лигасында 16 команда өнер көрсетеді. Элиталық лигаға жаңадан қосылған клубтар – «Каспий», «Ертіс» және «Алтай».
Қазақстан Суперкубогының финалында ҚПЛ-2025 чемпионы «Қайрат» пен Қазақстан Кубогы-2025 жеңімпазы «Тобыл» кездеседі.
Оқи отырыңыздар:
"Ақтөбе" "Қайраттың" экс-ойыншысынан бас тартты;
"Тобыл" шабуылшысы мансабын Өзбекстанда жалғастырмақ.