ӘЧ-2026: Түркия турнирді антирекордпен аяқтады
Парагвай құрамасы ӘЧ-2026 топтық кезеңінде Түркияны 1:0 есебімен жеңді.
Түркия ұлттық құрамасы 2026 жылғы әлем чемпионатында антирекорд орнатты. Түріктер турнирдегі алғашқы екі матчында қарсылас қақпасына 62 соққы жасағанымен, бірде-бір гол соға алмады. Бұл туралы Opta Sports телеграм-арнасы хабарлады.
Топтық кезеңнің 1-турында Түркия құрамасы Австралиядан 0:2 есебімен жеңілсе, 2-турда Парагвайға 0:1 есебімен есе жіберді.
Парагвай жылдам гол соқты
Ойындағы жалғыз гол матчтың 2-минутында тіркелді. Парагвай шабуылшысы Матиас Галарса Хулио Энкисоның пасын тиімді пайдаланып, командасын алға шығарды.
Ерте соғылған гол Парагвайға ойын жоспарын өзгертіп, қорғаныста жинақы қимылдауға мүмкіндік берді. Ал Түркия қалған уақытта есепті теңестіруге тырысқанымен, қарсылас қақпасына жол таба алмады.
Парагвай екінші таймды бір ойыншы кем өткізді
Бірінші таймның соңында Парагвай құрамасы алаңда он ойыншымен қалды. 45+3-минутта жартылай қорғаушы Мигель Алмирон қызыл қағаз алды.
Ол түрік қорғаушысы Мерт Мюлдюрге қатысты әрекетінен кейін алаңнан қуылды. Алмирон аузын қолымен жауып, қарсыласына бірнәрсе айтқаннан кейін төреші оны жазалады.
Осыдан кейін Түркия сан басымдығын алғанымен, оны нәтижеге айналдыра алмады.
Осы екі кездесудің қорытындысы бойынша түрік құрамасы әлем чемпионатынан мерзімінен бұрын шығып қалды.
Соңғы турда кімдер кездеседі?
D тобының үшінші турында Парагвай Австралия құрамасына қарсы ойнайды. Ал Түркия әлем чемпионатындағы соңғы матчын АҚШ құрамасына қарсы өткізеді.