30 минуттық үзіліс: ФИФА-ның тағы бір жаңашылдығы
ФИФА 2026 жылғы футболдан әлем чемпионатының финалдық матчында ерекше форматтағы шоу өткізуді жоспарлап отыр.
Финалда Супербоул үлгісіндегі шоу ұйымдастырылмақ
Transfer News Live мәліметінше, ФИФА әлем чемпионаты финалының үзілісінде ауқымды музыкалық бағдарлама өткізуді көздеп отыр. Ұйымдастырушылар бұл шоуды АҚШ-тағы әйгілі Супербоулдың үзіліс кезіндегі концертіне ұқсас форматта жасағысы келеді.
Әдетте футбол матчындағы үзіліс 15 минутқа созылады. Бірақ 2026 жылғы әлем чемпионатының финалында бұл уақыт екі есе ұзарып, 30 минутқа дейін жетуі мүмкін.
Алдын ала ақпарат бойынша, шоу бағдарламасына әлемдік деңгейдегі музыка жұлдыздары шақырылуы ықтимал. Олардың қатарында Шакира, Мадонна және оңтүстіккореялық танымал BTS тобы бар.
ФИФА-ның мақсаты – финалды тек жылдың басты футбол оқиғасы ретінде емес, сонымен қатар әлемдегі ең ірі ойын-сауық жобаларының біріне айналдыру.
Дереккөз мәліметінше, британиялық BBC телерадиокомпаниясы үзіліс кезіндегі музыкалық бағдарламаны көрсетпеу нұсқасын қарастырып жатыр. Оның орнына арна сарапшылар талдауына, бірінші тайм қорытындысына және матчтың тактикалық қырларын талқылауға басымдық беруі мүмкін.
Финал қайда және қашан өтеді?
Футболдан 2026 жылғы әлем чемпионатының финалы 19 шілде күні АҚШ-тың Ист-Ратерфорд қаласындағы “Метлайф Стэдиум” аренасында өтеді.
Стадион шамамен 82 500 көрерменге арналған. Финалдық кездесудің басталуы жергілікті уақытпен 15:00-ге жоспарланған. Бұл Астана уақыты бойынша 20 шілде түнгі 01:00-ге сәйкес келеді.
Қазір әлем чемпионаты АҚШ, Канада және Мексикада өтіп жатыр. Топтық кезең нәтижесі бойынша бірқатар құрама плей-офф кезеңіне жолдама алып үлгерді.