Мбаппе шет қалды: ӘЧ-2026 топтық кезеңінің үздіктер құрамы жарияланды
Үздіктер құрамына франциялық шабуылшының орнына бразилиялық футболшы Винисиус Жуниор енді.
Sofascore статистикалық порталы 2026 жылғы футболдан әлем чемпионатының топтық кезеңі қорытындысы бойынша символикалық құрама жасады. Тізім футболшылардың орташа бағалары негізінде түзілген. Бір қызығы, турнирдің үздік сұрмергендерінің бірі Килиан Мбаппеге бұл құрамадан орын табылмады.
Sofascore нұсқасы бойынша символикалық құраманың алдыңғы шебінде Лионель Месси, Эрлинг Холанд, Винисиус Жуниор және Усман Дембеле секілді жұлдыздар бар.
Мбаппе неге үздік құрамадан тыс қалды?
Франция құрамасының шабуылшысы Килиан Мбаппе топтық кезеңде төрт гол соғып, турнирдің үздік бомбардирлері қатарында жүр. Соған қарамастан Sofascore оны символикалық құрамаға қоспады.
Бұл рейтингте футболшылардың гол саны ғана емес, жалпы ойынға әсері, матчтардағы тұрақтылығы және орташа бағасы есепке алынған. Сондықтан жоғары нәтижелі шабуылшылар арасында Мбаппе үздік он бірлікке кіре алмады.
Месси ең жоғары баға алды
Символикалық құраманың ең жоғары бағасын Аргентина капитаны Лионель Месси иеленді. Оның орташа көрсеткіші — 9,07.
Месси шабуыл шебінде Эрлинг Холанд, Винисиус Жуниор және Усман Дембелемен бірге аталды. Бұл төрттік топтық кезеңдегі ең тиімді шабуылшылар қатарына енді.
Усман Дембеленің орташа бағасы — 8,57. Винисиус Жуниор 8,43 көрсеткішімен тізімге кірсе, Норвегия шабуылшысы Эрлинг Холанд 8,25 ұпай алды.
Испаниядан үш футболшы кірді
Sofascore жасаған символикалық құраманың қорғаныс және орталық аймағында Испания құрамасының бірден үш ойыншысы бар.
Қорғаныста Пау Кубарси 7,67 бағасымен, Эмерик Лапорт 7,93 көрсеткішімен аталды. Ал жартылай қорғаныста Родри 7,90 орташа бағамен үздіктер қатарына енді.
Sofascore жариялаған ӘЧ-2026 топтық кезеңінің символикалық құрамасы төмендегідей:
- Қақпашы: Возинья — Кабо-Верде, 7,67
- Қорғаушылар: Пау Кубарси — Испания, 7,67, Эмерик Лапорт — Испания, 7,93, Ян Паул ван Хекке — Нидерланд, 7,93
- Жартылай қорғаушылар: Джуд Беллингем — Англия, 7,44, Родри — Испания, 7,90, Бруну Фернандеш — Португалия, 7,97
- Шабуылшылар: Усман Дембеле — Франция, 8,57, Винисиус Жуниор — Бразилия, 8,43, Эрлинг Холанд — Норвегия, 8,25, Лионель Месси — Аргентина, 9,07
Әлем чемпионаты плей-офф кезеңіне өтті
Футболдан 2026 жылғы әлем чемпионаты 11 маусым мен 19 шілде аралығында АҚШ, Канада және Мексикада өтеді.
Қазіргі әлем чемпионы — Аргентина құрамасы. Лионель Месси бастаған команда турнирде чемпиондық атағын қорғауға тырысып жатыр.