"Монако" Поль Погбамен қоштасты
Француз жартылай қорғаушысы клуб сапында небәрі алты матч өткізді.
Франция құрамасының бұрынғы жартылай қорғаушысы Поль Погба "Монако" клубынан ресми түрде кетті. Тараптар 2027 жылдың маусымына дейін есептелген келісімшартты өзара келісім бойынша мерзімінен бұрын тоқтатты. Бұл туралы монегасктердің ресми сайты хабарлады.
Клубтың мәлімдеуінше, бастапқыда қойылған мақсаттар толық орындалмаған соң, тараптар жаңа маусымдағы алғашқы ресми матч қарсаңында ынтымақтастықты аяқтау жөнінде ортақ шешімге келген. "Монако" 2018 жылғы әлем чемпионына клубтағы кәсібилігі мен командаға қосқан үлесі үшін алғыс білдірді.
"Клуб Польге шынайы алғысын білдіреді және алдағы мансабына сәттілік тілейді", – делінген ресми мәлімдемеде.
Погбаның өзі де "Монако" басшылығына, командаластарына, бапкерлер штабына және жанкүйерлерге алғыс айтып, клуб намысын қорғауды ерекше тәжірибе деп атады.
Погба "Монакода" небәрі алты матч өткізді
Поль Погба "Монакоға" 2025 жылдың жазында ауысып, клубпен екі жылдық келісімшартқа отырған еді. Оның келісімі бастапқыда 2027 жылдың 30 маусымына дейін жарамды болатын. Алайда француз футболшысының командадағы кезеңі ойдағыдай болмады. Погба "Монако" сапында ресми турнирлерде бар болғаны алты матчқа қатысты.
Ұзақ үзілістен кейін кәсіби футболға оралған 33 жастағы жартылай қорғаушыға түрлі жарақаттар тұрақты түрде кедергі келтірді.