«Барыс» легионерлерінің жалақысын кім төлейді? (ВИДЕО)
Жаңа маусым алдындағы баспасөз жиынында «Барыс» хоккей клубының бас директоры Сәкен Мұсайбеков легионерлердің жалақысына қатысты сұраққа жауап берді.
Легионерлердің жалақысы қалай төленеді?
Сәкен Мұсайбековтің айтуынша, заңға сәйкес мемлекет пен квазимемлекеттік сектор қаражаты шетелдік ойыншылардың еңбекақысын төлеуге жұмсалмайды.
Қазір «Барыс» құрамында 20 қазақстандық ойыншы бар. Сонымен қатар клуб сегіз шетелдік легионерді шақырды.
Барлық жалақы мен келісімшарт бойынша міндеттемелер тек демеушілер есебінен төленеді.
«Жақын күндері біз негізгі демеушілерді ресми түрде жариялаймыз», – деді Мұсайбеков.
Өткен маусымдағы нәтиже
Өткен маусымда «Барыс» ҚХЛ-дың тұрақты чемпионатында сәтсіз өнер көрсетіп, 68 матчта небәрі 35 ұпай жинап, турнир кестесінің соңғы сатысында қалған болатын.
Осыдан кейін клубта басқару құрылымында және жаттықтырушылар құрамында өзгерістер болды.
Бас бапкер Ғалым Мәмбетәлиевтің орнына ресейлік маман Михаил Кравец тағайындалды.
Жаңа маусымға дайындық
Кравецтің басшылығымен астаналық клуб маусымаралық кезеңде бес кездесу өткізіп, оның үшеуінде жеңіске жетті.
ҚХЛ-дың жаңа маусымы 5 қыркүйекте басталады.
«Барыс» алғашқы ойынын 7 қыркүйекте Астанада «Тракторға» қарсы өткізеді.