Ел намысын қорғады, бірақ сыйақысыз қалды: Назым Қызайбай шындықты айтты!
Париж Олимпиадасында қола медаль иеленген қазақстандық боксшы Назым Қызайбай мемлекет тарапынан уәде етілген 75 мың доллар көлеміндегі сыйақы мен Алматы әкімдігі ұсынған пәтер кілтіне әлі күнге қол жеткізе алмай жүр.
"Бәрі уәде еткенмен, ештеңе берілмеді"
Назым Қызайбай Олимпиададан кейінгі уәделердің орындалмауы туралы ашық айтты:
“Мемлекет Олимпиададағы қола медаль үшін 75 мың доллар төлеуі тиіс болатын. Бірақ бұл сыйақы әлі аударылған жоқ. Өзге жүлдегерлер де алмады деп ойлаймын – ешкім алыпты дегенді естігенім жоқ”, – деді спортшы сұхбатында.
Пәтер де тек сөз жүзінде қалды
Олимпиададан кейін Алматы әкімдігі Назымға пәтер сыйлайтынын хабарлап, сертификат табыстаған. Бірақ спортшы нақты қоныс тойының болмағанын айтады:
“Қала әкімдігі көлік пен ақшалай сыйлықты бірден берді. Бірақ пәтерді 1,5–2 айдан кейін тапсырамыз деді. Содан бері алты ай өтті. Жақында ғана хабарласып, "спортшылар түгел жиналған кезде кілт табыстаймыз" деді. Күтудеміз”, – дейді Назым.
Мәселе жүйелі түрде қайталануда
Назым Қызайбай – жалғыз емес. Олимпиада жүлдегерлерінің бірі ешбір спортшыға сыйақылар әлі берілмегенін растаған. Бұл жағдай ұлттық спортшылар арасында наразылық туғызып отыр.