Жаңа Қабірхан бола ма? Арлан Дубайда қазақстандыққа миллион әкелді
Дубайдағы Jebel Ali ипподромында өткен беделді бәйгеде Арлан есімді ағылшын тұқымды сәйгүлік топ жарып, иесіне қомақты қаржы түсірді. Жарыс 1950 метр қашықтықта өтіп, жалпы жүлде қоры 86 000 дирхам болды.
Jebel Ali-дегі жеңіс: 1950 метрде бірінші келді
Emirates Racing Authority дерегінше, Commercial Bank of Dubai Stakes бәйгесінде Арлан мәре сызығын бірінші кесіп, негізгі сыйақыға ие болды. Бұл жарыстағы 1-орынға қарастырылған жүлде 51 600 дирхам.
Кейбір халықаралық шолуларда Арланның бұл бәйгеде қарсыластарынан айқын басым түскені де айтылады.
Сыйақы неше теңге?
51 600 дирхам бүгінгі бағамға жуық есептегенде шамамен 7,1 млн теңге болады (1 AED ≈ 137,08 KZT).
Ресми базаларда жылқы ARLAN (USA) ретінде тіркелген: бұл — оның АҚШ-та туғанын/тіркелгенін білдіреді. Деректер бойынша, Арлан 2022 жылдың 14 сәуірінде туған және иесі ретінде Merkhat Bulgynov көрсетілген.
Бір қызығы, Арланның карьерасында Қазақстандағы кезең де бар: Timeform жазбасында 2024 жылдың жазында Алматыдағы жарыста жеңіске жеткені көрсетілген.
«Қабірхан» факторы: жанкүйер неге салыстырып жатыр?
2024 жылы қазақстандық атбегілер арасында Қабірхан аты ерекше танылып, Дубайда $1 миллиондық деңгейдегі жарыста жеңіске жеткені туралы кең тараған.
Кейін Қабірханға қатысты Ресейде допинг төңірегінде дау шыққаны да жазылды: иесі «сынама ауыстырылды» деген уәж айтқан.