Ванкувер-2010 Олимпиадасының күміс жүлдегері, қазақстандық биатлоншы Елена Хрусталева Милан және Кортина-д’Ампеццодаағы сәтсіз нәтижелерден кейін отандық спортшыларға бағытталған сынға пікір білдірді.
Хрусталева Instagram желісіндегі kzsports парақшасында жазған пікірінде, кеңес айту мен сынау көптің қолынан келетінімен, мәселенің түп-тамырын анықтау әлдеқайда күрделі екенін атап өтті. Оның айтуынша, қазақстандық құраманың басым бөлігі — жас спортшылар, әрі олардың көбі үшін бұл алғашқы Олимпиада.
Олимпиада кезіндегі жан-жақтан түсетін назар да спортшыларға қосымша қысым болатынын алға тартқан ол өз тәжірибесін мысалға келтірді: алғашқы Олимпиадасында өзі де жүлдеден алыс қалғанын еске салды.
Елена Хрусталева мәселені тек эмоциямен емес, нақты талдаумен қарауға шақырды. Оның сөзінше, басты сұрақ — қаншалықты терең зерттеп, кейін қандай нақты қадам жасай алатынымыз.
Еске салайық, Милан–Кортина-2026 қысқы Олимпиадасында Қазақстан атынан 36 спортшы қатысып жатыр және олар 10 спорт түрінде ел намысын қорғауда.