Бұған дейін отандасымыз парабиатлондағы спринттік қуу жарысында алтын медаль жеңіп алған болатын.
Италияда өтіп жатқан Паралимпиада-2026 ойындарында парашаңғыдан ерлер арасындағы 20 шақырымдық жеке жарыс өтті. Бұл дисциплинада Қазақстан атынан Ербол Хамитов өнер көрсетті.
20 шақырымдық қашықтықта қазақстандық параспортшы жарысты жетінші орынмен аяқтады. Ол жеңімпаздан 1 минут 59,2 секундқа қалып қойды.
Алтын медальді Ресей спортшысы Иван Голубков жеңіп алды. Ол дистанцияны 51:55.0 уақытта еңсерді.
Екінші орынды Қытай өкілі Мао Джангву иеленді (+50.8), ал қола жүлде италиялық Джузеппе Ромелеға бұйырды (+1:22.1).
Айта кетейік, Ербол Хамитов Паралимпиада-2026 ойындарында Қазақстан құрамасына екі медаль сыйлады.
Милан мен Кортина-д’Ампеццо қалаларында өтіп жатқан Қысқы Паралимпиада ойындары бүгін, 15 наурыз күні, ресми түрде аяқталады.