Шахматтан Қазақстан құрамасы әлем чемпионатында Өзбекстанды жеңді

Kazchess алғашқы турда жеңіске жетті

Қазақстандық Kazchess командасы жарыстың бірінші айналымында Өзбекстан құрамасымен кездесіп, тартысты матчта 3,5:2,5 есебімен жеңіске жетті.

Бұл нәтиже отандық шахматшылар үшін маңызды болды. Себебі Өзбекстан құрамасының сапында шахмат тәжі үшін үміткерлер турнирінің 2026 жылғы жеңімпазы Жавохир Синдаров бірінші тақтада ойнады.

Қазақстан фавориттер қатарында

Kazchess командасы рапидтегі орташа рейтингі бойынша турнирдегі ең мықты үш команданың қатарына кіреді. Ұжымның капитаны – Қазақстан шахмат федерациясының бірінші вице-президенті Дәрмен Сәдуақасов.

Команда құрамында Қазақстанның танымал шахматшылары мен халықаралық деңгейдегі мықты ойыншылар бар. Атап айтқанда Бибісара Асаубаева, Қазыбек Нөгербек, Алдияр Аңсат, Меруерт Қамалиденова және әуесқой ойыншы Құмар Түліпов Kazchess сапында өнер көрсетеді.

Сондай-ақ командаға жұлдызды легионерлер де қосылған. Олардың қатарында Шахрияр Мамедьяров, Александр Грищук, Рихард Раппорт және Ван Хао бар.

Barys.kz командасы да жарысқа қатысады

Қазақстан атынан турнирге екінші команда – Barys.kz те қатысып жатыр. Бұл ұжым жарысты бастапқы тізімде тоғызыншы нөмірмен бастайды.

Barys.kz командасының капитаны – Қазақстан шахмат федерациясының атқарушы директоры Гүлмира Дәулетова.

Команда сапында тәжірибелі гроссмейстерлер Петр Свидлер мен Дмитрий Андрейкин, сондай-ақ жас қазақстандық шахматшылар Денис Махнев, Рамазан Жалмаханов, Даниял Сәпенов, Ерғали Сүлеймен, Ксения Балабаева, Алуа Нұрман және әуесқой ойыншы Айлин Зарқым өнер көрсетеді.

Турнир форматы қандай?

Рапидтен командалық әлем чемпионаты 17-19 маусым аралығында өтеді. Қатысушылар швейцариялық жүйе бойынша 12 раунд ойнайды.

Уақыт бақылауы – 15+10. Яғни әр ойыншыға партияға 15 минут беріледі және бірінші жүрістен бастап әр қадам үшін қосымша 10 секунд қосылады.

Матчтар алты тақтада өтеді. Ережеге сәйкес әр команданың құрамында міндетті түрде кемінде бір әйел шахматшы және Эло рейтингі 2000-нан төмен бір әуесқой ойыншы болуы керек.

Басты фаворит кім?

Бастапқы тізімнің көш басында халықаралық WR Chess командасы тұр. Оның құрамында әлем шахматының жұлдыздары – Магнус Карлсен, Максим Вашье-Лаграв, Фабиано Каруана, Уэсли Со, Ян-Кшиштоф Дуда бар.

Сонымен қатар WR Chess сапында Александра Горячкина мен бұрынғы әлем чемпионы Александра Костенюк те өнер көрсетеді.