Қазақстан Азиаданың алтыншы күнінде бес медаль жеңіп алды
Қазақстан құрамасы Жапонияның Айти және Нагоя қалаларында өтіп жатқан жазғы Азия ойындарының алтыншы жарыс күнінде бес қола медаль иеленді.
Байдарка спортынан алғашқы жүлде
Күннің алғашқы медалін Қазақстанның әйелдер құрамасы байдарка мен каноэ есуден жеңіп алды. Ольга Шмелёва, Татьяна Токарницкая, Стелла Суханова және Эвелина Костенкодан құралған экипаж төрт адамдық байдаркамен 500 метрге жарысуда үшінші орынға ие болды.
Қазақстандықтар мәреге 1:37.005 уақытта жетті. Қытай құрамасы 1:33.784 нәтижесімен чемпион атанса, Өзбекстан командасы 1:36.561 көрсеткішімен күміс медаль алды.
Семсершілер командалық сайыста қола алды
Қазақстандық шпагашы қыздар да Азиада жүлдегерлері қатарына қосылды. Командалық турнирдің жартылай финалында София Николайчук, Дарья Самоделкина және Ирина Бакалдина Қытай құрамасына 21:45 есебімен есе жіберді.
Владислава Андреева қосалқы құрамда болды. Жартылай финалға жеткен Қазақстан командасына қола медаль табысталды.
Ислам Сәтпаев мергендер сайысында үздік үштікке енді
Нысана көздеуден Ислам Сәтпаев Қазақстан қоржынына тағы бір қола жүлде салды. Ол 50 метр қашықтықтан үш қалыпта винтовкамен оқ атудың жеке финалында 348,3 ұпай жинады.
Бұл көрсеткіш қазақстандық мергенге жарысты үшінші орынмен аяқтауға мүмкіндік берді.
Жеңіл атлетикадан екі қола медаль
Қазақстан құрамасы жеңіл атлетика жарыстарында бірден екі жүлде иеленді.
Сырықпен секіру финалында Полина Иванова 4,15 метр биіктікті бағындырды. Ол дәл осындай нәтиже көрсеткен үндістандық Бараника Элангованмен үшінші орынды бөлісті.
Алина Чистякова жетісайыстың жеті кезеңі бойынша 5568 ұпай жинап, қола медаль місе тұтты.
Милад Карими жүлдеге бір қадам жетпей қалды
Қазақстандық гимнаст Милад Карими кермедегі жаттығудың финалында 13.666 ұпай алды. Оның нәтижесі филиппиндік Карл Джарел Элдрю Юлоның көрсеткішімен тең болды. Бірақ қосымша есеп бойынша қола медаль филиппиндік гимнасқа бұйырып, Карими төртінші орында қалды.
Сонымен қатар Максим Фроловский 10 000 метрге жүгіруде алтыншы нәтиже көрсетті. Ал Мария Шувалова 400 метрлік жарыстың финалына жолдама алды.
Боксшылар жарысты аяқтады
Алтыншы жарыс күні Қазақстан бокс құрамасы үшін сәтсіз өтті. Назым Қызайбай мен Оразбек Асылқұлов алғашқы жекпе-жектерінде төрешілердің бөлек шешімімен 1:4 есебінде жеңілді.
Осылайша екі қазақстандық боксшы да Азиада-2026 турнирінің 1/8 финалында жарыстан шығып қалды.
Қазақстан медаль кестесінде төртінші орында тұр
Алғашқы бес жарыс күнінен кейін Қазақстан қоржынында 25 жүлде болған еді. Алтыншы күнде жеңіп алынған бес қола медальдан кейін жалпы көрсеткіш 30-ға жетті:
- 8 алтын медаль;
- 8 күміс медаль;
- 14 қола медаль.
Қазақстан құрамасы Азиада-2026 жалпыкомандалық медаль кестесінде төртінші орында келеді. Айти мен Нагоядағы Азия ойындары 4 қазанда мәресіне жетеді.