Елімізде сақалды спортшылардың тізімі жасалды
Осылайша жат ағымның жетегінде кеткен спортшылар анықталмақ.
Туризм және спорт вице-министрі Серік Жарасбаев Мәжіліс қарауында жатқан Спорт туралы заң жобасына терроризм мен эктремизмге қарсы нормалар енгізілгенін айтты.
Бұл мәселе Мәжілісте спорт тақырыбы талқыланған кезде көтерілді. Депутат Жигули Дайрабаев сақалы тым ұзын спорт саңлақтарын сынға алған болатын. Дінге қатты берілсе, спортын қойып, «мешітке барып намаз оқуға» кеңес берген еді.
Өз кезегінде вице-министр бұл мәселенің расымен де өзекті екенін айтып, сақалды спортшылардың тізімі барын хабарлады.
«Өкінішке қарай, қазіргі таңда көптеген спорт түрлерінде, өзіңіз айтып отырғандай, діннің қате ағымына кетіп қалған спортшыларымыз бар. Оны білеміз, тізімі бар. Спорт туралы заң жобасына терроризм мен эктремизмге қарсы нормаларды енгізіп отырмыз. Оны депутаттар қолдады», - деді Серік Жарасбаев.